ޓޫރިޒަމް ޕްރޮމޯޓްކުރަން ބޭއްވި ހަރަކާތުގައި ރައީސްގެ ދެކަނބަލުން ޚާއްޞަ ވަގުތުކޮޅެއް ބޮލީވުޑް ތަރިންނާއެކު!
ދިވެހިރާއްޖޭގެ ފަތުރުވެރިކަން ޕްރޮމޯޓްކުރަން ބޭއްވި ހަރަކާތުގައި ރައީސްގެ ދެކަނބަލުން ޚާއްޞަ ވަގުތުކޮޅެއް ބޮލީވުޑް ތަރިންނާއެކު ހޭދަކުރައްވައިފިއެވެ.
މި ހަރަކާތް ކުރިއަށް ގެންގޮސްފައިވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ދެކަނބަލުން މިހާރު އިންޑިއާއަށް ކުރައްވާ ދަތުރުފުޅުގެ ތެރެއިންނެވެ. ރައީސްގެ ދެކަނބަލުން ވަނީ ބޮލީވުޑްގެ އިންޑަސްޓްރީގެ މައި ސިޓީ މުމްބާއީއަށް ވަޑައިގެން ޓޫރިޒަމްގެ ޚާއްޞަ ހަރަކާތުގައި ބައިވެރިވެވަޑައިގެންފައެވެ.
މި ޚާއްޞަ ޓޫރިޒަމް ހަރަކާތުގައި އިންޑިއާގެ މަޝްހޫރު ފަންނާނުން ބައިވެރިވިއެވެ. އަދި ރައީސުލްޖުމްހޫރިއްޔާ ބައްދަލުކުރައްވާ ރާއްޖެއާމެދު ދެކޭ ގޮތް ހިއްސާކުރިއެވެ. ރައީސާއެކު ގިނަ ވަގުތުތަކެއް އެ ފަންނާން ހޭދަކުރިއެވެ.
މި ހަރަކާތުގައި ބައިވެރިވި ފަންނާނުންގެ ތެރޭގައި ޝިލްޕާ ޝެޓީ، ޝޮނާކްޝީ ސިންހައާއި އޭނާގެ ފިރިމީހާ ޒަހީރު އިގުބާލް، ސަނީ ކޯޝަލް ކަރިޝްމާ ކަޕޫރު، އަރުބާޒް ޚާން ހިމެނެއެވެ. އަދި މަޝްހޫރު މޭކަޕް އާޓިސްޓް ސުރާ ޚާން ފަދަ މަޝްހޫރު މީހުންވެސް ބައިވެރިވިއެވެ.މި ހަރަކާތުގައި އޭގެ ތެރެއިން ބައެއް ފަންނާނުން ޕީއެސްއެމް ނިއުސްއާ ވާހަކަ ދެއްކިއެވެ. އެގޮތުން ޝިލްޕާ ޝެޓީ ބުނީ ރާއްޖެއަކީ އަބަދުވެސް ދާހިތްވާ މަންޒިލްކަމަށާއި، ރާއްޖެއަށް ކޮންމެ އަހަރަކު ދާކަމަށެވެ.
ކޮންމެ އަހަރަކުވެސް ރާއްޖެއަށް އެންމެ ގިނައިން ފަތުރުވެރިން ޒިޔާރަތްކުރާ 10 ޤައުމުގެ ތެރޭގައި އިންޑިއާ ހިމެނެއެވެ. ޚާއްޞަކޮށް އިންޑިއާގެ ފަންނާނުންގެ މެދުގައި ރާއްޖެއަކީ ޗުއްޓީ ހޭދަކޮށްލަން އެފަދަ ދެވަނައެއް ނެތް މަންޒިލެކެވެ. ކޮންމެ އަހަރަކުވެސް އިންޑިއާގެ މަޝްހޫރު ފިލްމީ ތަރިން ރާއްޖެއަށް އެތައް ފަހަރަކު ޒިޔާރަތްކުރެއެވެ.އިންޑިއާއިން މިއަހަރުގެ މިހާތަނަށް ރާއްޖެއަށް ލައްކައަކާ ގާތްކުރާ ޢަދަދަކަށް ފަތުރުވެރިން ޒިޔާރަތްކޮށްފައިވެެއެވެ.