ރައީސުލްޖުމްހޫރިއްޔާގެ އަނބިކަނބަލުން ބެންގަލޫރުގެ ސެއިންޓް ޖޯސެފް ޔުނިވަރސިޓީ އަށް ޒިޔާރަތް ކުރައްވައިފި
ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުޙައްމަދު، ބެޗްލަރސް ޑިގްރީ ޙާޞިލުކުރެއްވި ބެންގަލޫރުގެ ސެއިންޓް ޖޯސެފް ޔުނިވަރސިޓީ ޒިޔާރަތްކުރައްވައިފިއެވެ.
މެޑަމް ސާޖިދާ އަށް މަރުހަބާ ދެންނެވީ ސެއިންޓް ޖޯސެފް ޔުނިވާސިޓީގެ އޮނަރަބަލް ވައިސް ޗާންސެލަރު ރެވް ޑރ ވިކްޓާ ލޯބޯ އާއި ރަޖިސްޓްރާ ޕްރޮފެސަރު ޑރ މެލްވިން ކޮލަކޯ އެވެ.
ވައިސް ޗާންސެލަރ ވަނީ ރައީސުލްޖުމްހޫރިއްޔާގެ އަނބިކަނބަލުން ސެއިންޓް ޖޯސެފް ޔުނިވަރސިޓީއަށް ކުރެއްވި ޒިޔާރަތަށް ޝުކުރު އަދާކުރައްވައި، ރައީސުލްޖުމްހޫރިއްޔާގެ އަނބިކަނބަލުންނަކީ އެ ޔުނިވަރސިޓީގެ ޢިއްޒަތްތެރި ކުރީގެ ބޭފުޅަކަށްވާތީ އުފާކުރައްވާކަމުގައި ވިދާޅުވެފައެވެ.
ރައީސުލްޖުމްހޫރިއްޔާގެ އަނބިކަނބަލުން ވަނީ ސެއިންޓް ޖޯސެފް ޔުނިވަރސިޓީއަށް އެނބުރި ވަޑައިގަތުމުން އުފާކުރައްވާ ކަމަށާއި، މަތީ ތަޢުލީމުގެ ދަތުރު ފެއްޓެވި ތަނަކީ އެ ޔުނިވަރސިޓީކަން ފާހަގަކުރައްވާފައެވެ. އަދި ސެއިންޓް ޖޯސެފް ޔުނިވާސިޓީއަކީ އެކަމަނާ އާއި ވަރަށް ގާތް ތަނެއް ކަމަށްވެސް ވިދާޅުވި އެވެ.
ރައީސުލްޖުމްހޫރިއްޔާގެ އަނބިކަނބަލުން ދެއްކެވި ވާހަކަފުޅުގައި، ސެއިންޓް ޖޯސެފްގައި ހޭދަކުރެއްވި ދުވަސްތަކަކީ ވަރަށް ބޮޑު ތަޖުރިބާއެއް ކަމަށާއި، އަދި ބެންގަލޫރުގައި ކިޔަވަމުން ދިޔައިރުވެސް އެ ސިޓީއަކީ ވަރަށް ހަރުދަނާ އަދި ގިނަ ބަހުރުވަތަކާއި ސަގާފަތްތައް ހިމެނޭ ތަފާތު ސިޓީއެއްގެ ގޮތުގައި ފެނުނު ކަމަށް ވިދާޅުވިއެވެ.