ރައީސް މުޢިއްޒުގެ ވަޢުދުފުޅާ އެއްގޮތަށް ބިންވެރިޔާ ސްކީމްގެ ދަށުން ގޯތި ލިބިފައިވާ ފަރާތްތަކަށް ރަޖިސްޓްރީ ހަވާލުކުރަން ފަށައިފި

ރައީސުލް ޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅާ އެއްގޮތަށް ބިންވެރިޔާ ސްކީމްގެ ދަށުން ގޯތި ލިބިފައިވާ ފަރާތްތަކަށް ރަޖިސްޓްރީ ހަވާލުކުރަން ފަށައިފިއެވެ.

ބިންވެރިޔާ ސްކީމްގެ ދަށުން ގޯތި ލިބިފައިވާ ފަރާތްތަކަށް ރަޖިސްޓްރީ ހަވާލު ކުރައްވަމުން ގެންދަވާ ސަރަޙައްދު ބައްލަވާލެއްވުމަށް ހައުސިންގ މިނިސްޓަރ ޑރ. އަލީ ހައިދަރު ވަޑައިގެންނެވިއެވެ.

ހައުސިން މިނިސްޓްރީން ހާމަކުރިގޮތުގައި، ގޯތި ލިބޭ ފަރާތްތަކަށް މިއަދު ހެނދުނު 10:00 އިން ފެށިގެން ރެޖިސްޓްރީ ހަވާލު ކުރުމުގެ މަސައްކަތް ވަނީ ފަށާފައެވެ. އަދި ބިން ލިބޭ ފަރާތްތަކަށް 4004994 އަދި 4004797 ނަންބަރުން ގުޅާނެ ކަމަށް ވެސް އެ މިނިސްޓްރީން ވަނީ ބުނެފައެވެ.

ނިމިދިޔަ ރިޔާސީ އިންތިޚާބުގެ ކެމްޕޭނުގައި ރައީސް މުޢިއްޒު ވަނީ ރައްޔިތުންނަށް ލިބިފައި އޮތް އެއްވެސް ގޯއްޗެއް އަދި ފްލެޓެއްވެސް އަދި ލިބެން އޮތް ބޯހިޔާވަހިކަމަކަށް ވެސް ހުރަސް ނާޅުއްވާނެ ކަމުގެ ޔަޤީންކަން ދެއްވާފައެވެ.

އެގޮތުން ރައީސް މުޢިއްޒު އޭރު ވިދާޅުވީ، އެންމެ މުހިންމު ކަމަކަށް ވާނީ ރައްޔިތުންނަށް ބޯހިޔާވަހިކަން ފޯރުކޮށްދިނުން ކަމަށާއި އެކަން ޔަޤީނުން ވެސް ކޮށްދެއްވާނެ ކަމަށެވެ. އަދި މިދިޔަ ސަރުކާރުން ދީފައިވާ އެއްވެސް ހިޔާވަހި ކަމެއް އަތުނުލާނެ ކަމުގެ ޔަޤީންކަން އެމަނިކުފާނު ތަކުރާރުކޮށް ދެއްވާފައިވާއިރު ވެރިކަމަށް އިންތިޚާބު ވުމަށްފަހުވެސް އެ ވާހަކަ ވިދާޅުވެފައިވަނީ ހަމަ އެގޮތަށެވެ.

ބިންވެރިޔާ ސްކީމްގެ ދަށުން ގޯތި ލިބިފައިވާ ފަރާތްތަކަށް ރައީސް ޑރ މުޢިއްޒުގެ ވަޢުދުފުޅާ އެއްގޮތަށް ރަޖިސްޓްރީ ހަވާލުކުރުން ކުރިޔަށްދަނީ.

ރާއްޖޭގައި ދިމާވެފައިވާ އެންމެ ބޮޑު މައްސަލަ ކަމުގައިވާ ބޯހިޔާ ވަހިކަމުގެ މައްސަލައަށް ވަށާ ޖެހޭ ހައްލެއް ހޯދުމަށްޓަކައި ރައީސް މުޢިއްޒު އެކުލަވާލާފައިވާ ސިޔާސަތު ނިމިގެން ދާއިރު ރާއްޖޭގައި ބޯހިޔާވަހިކަމަށް ދަތިވާނެ އެއްވެސް ރައްޔިތަކު ނުހުންނާނެ ކަމުގެ ޔަޤީންކަން ރައީސް ވަނީ ދެއްވާފައެވެ.

.