ދިވެހިރާއްޖޭގައި ވޭޕްކުރުން ހުއްޓުވުމަށް ރައީސުލްޖުމްހޫރިއްޔާ މުހިންމު ނިންމެވުންތަކެއް ނިންމަވައިފި

އަންނަ މަހުގެ 15 ވަނަ ދުވަހުން ފެށިގެން ދިވެހިރާއްޖޭގައި ވޭޕްކުރުން ހުއްޓުވުމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު މުހިންމު ނިންމެވުންތަކެއް ނިންމަވައިފިއެވެ.

މި ނިންމެވުންތައް ހާމަކުރައްވައި، އެމަނިކުފާނުގެ ރަސްމީ އެކްސް އެކައުންޓުން މިއަދު ޙިއްޞާކުރެއްވި ޕޯސްޓެއްގައި ވިދާޅުވީ، "ވޭޕްކުރުމަށް ބޭނުންކުރާ ތަކެއްޗާއި، އެ ތަކެތީގެ ވަކިވަކި ބައިތައް ދިވެހިރާއްޖެއަށް އެތެރުކުރުން 15 ނޮވެމްބަރ 2024 އިން ފެށިގެން މަނާ ކުރުމަށާއި، ދިވެހިރާއްޖޭގައި ވޭޕްކުރުމަށް ބޭނުންކުރާ ތަކެތި ބޭނުންކުރުމާއި، ގެންގުޅުމާއި، އުފެއްދުމާއި، ވިއްކުމާއި، ރާއްޖޭގައި އިޝްތިހާރު ކުރުމާއި ހިލޭބެހުން 15 ޑިސެމްބަރ 2024 އިން ފެށިގެން މަނާކުރުމަށް ކުރަންޖެހޭ އެންމެހާ ކަންކަން ކުރުމަށް ކަމާބެހޭ ފަރާތްތަކަށް" އެމަނިކުފާނު އަންގަވާފައިވާ ކަމަށެވެ.

މި ނިންމެވުން ރައީސް ނިންމެވި އިރު މި ދަނޑިވަޅަކީ ރާއްޖޭގައި ވޭޕް އަދި އިލެކްޓްނިކް ސިނގިރޭޓް މަނާކުރުމަށް އަވަސް ފިޔަވަޅުތަކެއް އެޅުމަށް ރާއްޖޭގެ މެޑިކަލް އެސޯސިއޭޝަނާއި، ކުޅިވަރު ޖަމިއްޔާތަކުގެ އިތުރުން ބެލެނިވެރިންވެސް ވެސް ވަނީ ރައީސްގެ އަރިހުން އެދިވަޑައިގެންފައިވާ ދަނޑިވަޅެކެވެ.

ވޭޕާއި އީ-ސިނގިރޭޓުގެ ސަބަބުން ސިއްހަތަށް ކުރިމަތިވާ ނޭދެވޭ އަސަރުތަކާއި އެ ބާވަތްތަކުގެ ބިރުވެރިކަމާ ގުޅޭގޮތުން ޑޮކްޓަރުންނާއި އެނޫންވެސް ކަމާ ގުޅުން ހުރި އިދާރާތަކުން ނަސޭހަތްތެރިވި ނަމަވެސް އެ ބާވަތްތައް ބޭނުން ކުރާ މިންވަރު ދުވަހެއް ދުވަހަކަށް އިތުރުވަމުން އަންނަ ކަމުގެ ކަންބޮޑުވުން އެ ޖަމިއްޔާތަކުން ވަނީ ފާޅުކޮށްފައެވެ.

މީގެކުރިން ރާއްޖޭގައި ވެރިކަންކުރެއްވި ރައީސުންނަށް ނިންމަވަން ކެރިވަޑައިނުގެންނެވި މިފަދަ މުހިންމު ކަންކަން ރައީސް ޑރ . މުޢިއްޒު ދަނީ ނިންމަވަމުންކަން ފާހަގަކޮށްލެވެއެވެ. ރައީސްގެ މި ނިންމެވުމާއިއެކު ގިނަބަޔަކު ދަނީ ރައީސް އާއި ސަރުކާރަށް ޝުކުރު އަދާކުރަމުންނެވެ.