ސަރުކާރުގެ ޚަރަދުކުޑަ ކުރުމަށް 228 ސިޔާސީ މުވައްޒަފުން ވަކިކުރުމަށް ރައީސް ނިންމަވައިފި

ސަރުކާރުގެ ރީފޯމް އެޖެންޑާގެ ދަށުން ޚަރަދު ކުޑަކުރުމަށް 228 ސިޔާސީ މުވައްޒަފުން ވަޒީފާއިން ވަކި ކުރުމަށް ރައީސް ޑރ.މުޙައްމަދު މުޢިއްޒު ނިންމަވައިފިއެވެ.

މި ނިންމެވުމާއި ގުޅޭގޮތުން ރައީސް އެކްސްގައި ކުރެއްވި ޕޯސްޓެއްގައި ވިދާޅުވީ ޚަރަދު ކުޑަ ކުރުމަށް އަޅާ ފިޔަވަޅުތަކުގެ ތެރެއިން، ސަރުކާރުގެ އެކި ވުޒާރާ ތަކުގައި ތިބި 228 ސިޔާސީ މުވައްޒަފުން ކުރިއަށް އޮތް 15 ދުވަހުގެ ތެރޭގައި ވަޒީފާއިން ވަކި ކުރުމަށް މިހާރު އަންގަވާފައިވާނެ ކަމަށެވެ.

ވަކިކުރަން ނިންމެވި މަޤަމްތަކުގެ ތެރޭގައި ހިމެނެނީ:

• - 7 ސްޓޭޓް މިނިސްޓަރުން

• - 43 ޑެޕިއުޓީ މިނިސްޓަރުން

• - 109 ސީނިއާ ޕޮލިޓކަލް ޑިރެކްޓަރުން

• - 69 ޕޮލިޓިކަލް ޑިރެކްޓަރުން ނެވެ.

ރައީސް ވިދާޅުވީ މި ނިންމުމާއެކު ދަޢުލަތުގެ ބަޖެޓުން މަހެއްގެ މައްޗަށް 5.7 މިލިއަން ރުފިޔާ ސަލާމަތް ކުރެވޭނެ ކަމަށެވެ. އެއީ އަހަރަކަށް ބަލާނަމަ 68.6 މިލިއަން ރުފިޔާއެވެ.