ބަޖެޓް2025: އެންމެ ޚާއްޞަ އިސްކަމެއް ގެދޮރުވެރިކަމަށް!

2025 ވަނަ އަހަރަށް ލަފާކޮށް ދަޢުލަތުން ހުށަހެޅި ބަޖެޓުގައި ގެދޮރުވެރިކަމަށް ޚާއްޞަ އިސްކަމެއްދީ 56.6 ބިލިއަން ރުފިޔާގެ ބޮޑު ބަޖެޓެއް ރައްޔިތުންގެ މަޖިލީހަށް ހުށަހަޅައިފިއެވެ.

އަންނަ އަހަރަށް ހުށަހަޅާ ދައުލަތުގެ ބަޖެޓުގެ ޖުމްލައަކީ 56,647,600,859 (ފަންސާސް ހަ ބިލިއަން، ހަސަތޭކަ ސާޅީސް ހަތް މިލިއަން، ހަ ލައްކަ، އަށްސަތޭކަ ފަންސާސް ނުވަ) ރުފިޔާއެވެ. ފިނޭންސުން ބުނި ގޮތުގައި މީގެ ތެރެއިން، ޚަރަދުގެ ގޮތުގައި ހިނގާނީ 49.2 ބިލިއަން ރުފިޔާއެވެ. އެއީ ރިކަރަންޓް ޚަރަދުގެ ގޮތުގައި 35.9 ބިލިއަން ރުފިޔާއާއި ކެޕިޓަލް ޚަރަދުގެ ގޮތުގައި ކަނޑައެޅިފައިވާ 13.3 ބިލިއަން ރުފިޔާއެވެ.

ސަރުކާރުން 1.5 ބިލިއަން ރުފިޔާގެ ހައުސިން މަޝްރޫޢުއެއް ހިންގުމަށް ވަނީ ހަމަޖެހިފައެވެ. އަދި ސަރުކާރުގެ ސިޔާސަތުގެ ތެރެއިން %5 އިންސައްތައިގައި ދެ ބިލިއަނާއި ހަތަރު ބިލިއަނާ ދެމެދުގެ ލޯނު ފަހިކޮށްދިނުމަށް ވެސް ވަނީ ހަމަޖެހިފައެވެ.

ދިވެހި ރައްޔިތުންނަށް ދިމާވެފައިވާ އިޖްތިމާޢީ އެންމެ ބޮޑު އެއް މައްސަލައަކީ ގެދޮރުވެރިކަމާއި ބޯހިޔާވެހިކަމުގެ މައްސަލަ ކަން ފާހަގަކުރައްވައި މިނިސްޓަރު ޒަމީރު ވިދާޅުވީ ގެދޮރުވެރިކަމާއި ބޯހިޔާވަހިކަމަށް އެދެވޭ ހައްލެއް ހޯދައިދީ، ދިވެހި އާބާދީގެ ބޮޑު ބަޔަކީ ގެދޮރުވެރި ބަޔަކަށް ހެދުމަކީ ރައީސް ޑރ. މުޙައްމަދު މުޢިއްޒުގެ އެންމެ ބޮޑު އެއް ތަސައްވުރު ކަމަށެވެ. އެހެންކަމުން 2025 ވަނަ އަހަރުގެ ބަޖެޓު އެކުލަވާލުމުގައި އެންމެ ބޮޑު އިސްކަމެއް ދީފައިވާނީ ރައީސުލްޖުމްހޫރިއްޔާގެ މި ތަސައްވުރާއި އެއްގޮތަށް ދިވެހި ރައްޔިތުންނަކީ ގެދޮރުވެރި ބަޔަކަށް ހެދުމަށް ކަމުގައި މިނިސްޓަރު ވިދާޅުވިއެވެ.މީގެއިތުރުން 1.8 ބިލިއަން ރުފިޔާގެ ޖާގަ ގެދޮރުވެރިކަމުގެ އައު ޕީއެސްއައިޕީ މަޝްރޫއުތައް ހިންގުމަށް ކަނޑައަޅާފައިވެއެވެ، މި ބަޖެޓަކީ ދިވެހިރާއްޖޭގެ ތާރީހުގައި އެއް އަހަރުދުވަހުގެ ތެރޭގައި ގެދޮރުވެރިކަމަށް ހާއްސަކޮށްގެން ސަރުކާރަކުން އެންމެ ބޮޑު ހޭދައެއް ކުރުމަށް ހުށަހަޅާފައިވާ ބަޖެޓެވެ.

މިނިސްޓަރު ވިދާޅުވީ ރައީސުލްޖުމްހޫރިއްޔާ ތަސައްވުރުކުރައްވާ އިޤްތިޞާދީ ކުރިއެރުމަކީ އެންމެހައި ރައްޔިތުންނަށް އޭގެ މަންފާ ހަމަހަމަކަމާއެކު ލިބޭނެފަދަ ކުރިއެރުމަކަށް ހެދުމަށް ދިވެހީން ގެދޮރުވެރިވުން ކޮންމެހެން މުހިންމު ކަމަށެވެ. ފާއިތުވި ސަރުކާރުތަކުން ދިވެހީން ގެދޮރުވެރިކުރުވުމަށް މަސައްކަތްތަކެއް ކޮށްފައިވީނަމަވެސް، އަދާއި ހަމައަށް މި މައްސަލައަށްވަނީ އެދެވޭ ހައްލެއް ނުލިބި ކަމަށްވެސް މިނިސްޓަރު ވިދާޅުވިއެވެ.

އަޅުގަނޑު ގަބޫލުކުރާ ގޮތުގައި ދައުލަތުގެ ބަޖެޓަކީ ދައުލަތް ހިންގުމުގެ މަސްދަރު. ކޮންމެ އަހަރަކަށް ލަފާކުރާ އާމްދަނީއާއި ޚަރަދާ އެކީގައި ތިޔަ އިއްޒަތްތެރި މަޖިލީހަށް ހުށަހަޅަމުންދާ ބަޖެޓުތަކަކީ ރައްޔިތުންނަށް ގިނަ ވައުދުތަކެއްވެގެން ވެރިކަމަށް އަންނަ ފަރާތްތަކުން ރައްޔިތުންނަށް އެ ވައުދުތައް ހަގީގަތަކަށް ހެދުމަށް ކަންކަން ރާވައި ތަންފީޒުކުރުމަށް ހުށަހަޅާ ގޮތުގެ ޕްލޭން. މިގޮތުން ކޮންމެ އަހަރަކަށް ލަފާކޮށް ހުށަހަޅާ ބަޖެޓަކީ އޭގެކުރިން ވޭތުވެގޮސްފައިވާ އަހަރުތަކުގައި ނިންމާފައިވާ ނިންމުންތަކާއި ތަންފީޒުކޮށްފައިވާ ސިޔާސަތުތަކާ ގުޅިގެން އެ ކަންކަމުގެ އެދެވޭ ނަތީޖާ ހިމެނޭ ކަންކަން ދަމަހައްޓައި، އަދި ނޭދެވޭ ނަތީޖާ ހިމެނޭ ކަންކަން ހައްލުކުރުމަށް ރާވާފައިވާ ގޮތް އެކުލެވޭ ހުށަހެޅުމެއް.

މިނިސްޓަރު މޫސާ ޒަމީރު

މިހާރު އުފައްދާފައި ހުރި އެތައް ނިޒާމީ މައްސަލަތަކަށް އެދެވޭ ހައްލުތަކެއް ހޯދައިގެން މެނުވީ މިނިވަން، އިންސާފުވެރި، ތިޔާގި އަދި ރައްކާތެރި ދިވެހީންގެރާއްޖެއާއި ހަމައަށް ވާސިލުވެވެން ނެތް ކަމުގައި ވެސް މިނިސްޓަރ ޒަމީރު ވިދާޅުވިއެވެ.