ފަތިސް ނަމާދުގެ ޖަމާޢަތުން ނަޞްރުގެ ދުވަސް ފެއްޓެވީ ރައީސުލްޖުމްހޫރިއްޔާ އާއިއެކު!

މިއަދު މިފާހަގަކުރަމުންދާ ނަޞްރުގެ ދުވަސް ފެށިގެން ދިޔައީ ފަތިސް ނަމާދުގެ ޖަމާޢަތުން ރައީސުލްޖުމްހޫރިއްޔާ އާއިއެކުގައެވެ.

އިސްލާމީ މަރުކަޒުގައި އެއް ޖަމާއަތުގައި ކުރެވުނު ފަތިސް ނަމާދުގައި ރައީސުލްޖުމްހޫރިއްޔާ އަދި ސިފައިންގެ އެންމެ މަތީވެރިޔާ، ޑރ. މުޙައްމަދު މުޢިއްޒާއި ދިފާއީ ވަޒީރު، މުހައްމަދު ޣައްސާން މައުމޫނާއި، ޗީފް އޮފް ޑިފެންސް ފޯސް، މޭޖާ ޖެނެރަލް އިބްރާހީމް ހިލްމީއާއި، ޖެނެރަލް އޮފިސަރުންނާއި، އޮފިސަރުންގެ އިތުރުން ގިނަ އަދަދެއްގެ ސިފައިންނާއި އާންމުން ބައިވެރިވިއެވެ.

ސިފައިންގެ ހުރިހާ އޭރިއާ ކޮމާންޑުތަކެއްގައި ވެސް ނަސަރުގެ ދުވަސް ފާހަގަކުރުމުގެ ގޮތުން އެއް ޖަމާއަތެއްގައި ފަތިސް ނަމާދުކޮށްފައިވެއެވެ.

އެއަށްފަހުގައި ތިނެއް ނޮވެންބަރުގެ ހަނދާނީ ބިނާ ސަރަހައްދުގައި މިއަދު ހެނދުނު 06:00 ގައި ދިދަ ނެގުމުގެ ރަސްމިއްޔާތުވަނީ ބާއްވާފައެވެ.

5 އަހަރުގެ މެދު ކެނޑުމަކަށްފަހު މިއަހަރުގެ 3 ނޮވެމްބަރ ކުލަގަދަކޮށް ފާހަގަކުރުމަށް ސަރުކާރުން ވަނީ ނިންމާފައެވެ. ނަޞްރުގެ ދުވަހާއި ގުޅިގެން މިއަހަރު ރާއްޖޭގެ އެކި ކަންކޮޅުތަކުގައި ގިނަ ހަރަކާތްތަކެއް ކުރިއަށް ގެންދިއުމަށް ވަނީ ނިންމާފައެވެ.