މިނިސްޓަރ މާރިޔާގެ ބައްޕާފުޅު އަވަހާރަވުމުން ރައީސް ތަޢުޒިޔާ ދަންނަވައިފި
މިނިސްޓަރ އޮފް ހަޔަރ އެޑިޔުކޭޝަން، ލޭބަރ އެންޑް ސްކިލްސް ޑިވެލޮޕްމަންޓް، ޑޮކްޓަރ މަރްޔަމް މާރިޔާގެ ބައްޕާފުޅު މުޙައްމަދު ޔޫސުފް އަވަހާރަވުމުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތަޢުޒިޔާ ދަންނަވައިފިއެވެ.
ސޯޝަލްމީޑިއާގައި ކުރެެއްވި ޕޯސްޓެއްގައި ރައީސް ވިދާޅުވީ މިނިސްޓަރ އޮފް ހަޔަރ އެޑިޔުކޭޝަން، ލޭބަރ އެންޑް ސްކިލްސް ޑިވެލޮޕްމަންޓް، ޑޮކްޓަރ މަރްޔަމް މާރިޔާގެ ލޮބުވެތި ބައްޕާފުޅު މުޙައްމަދު ޔޫސުފް އަވަހާރަވި ޚަބަރު އެމަނިކުފާނު އަޑުއެއްސެވީ ފުން ހިތާމައާއިއެކުގައި ކަމަށެވެ.
ރައީސް ވަނީ މަރްޙޫމް މުޙައްމަދު ޔޫސުފްގެ ޚިދުމަތް ފާހަގަކުރައްވާފައެވެ.
ރައީސް ވިދާޅުވީ މަރްޙޫމް މުޙައްމަދު ޔޫސުފް (ކުވާ މޮހޮދޭ) އަކީ، ވިޔަފާރީގެ ދާއިރާއިން ބޮޑެތި ޚިދުމަތްތަކެއް ޤައުމަށް ކޮށްދެއްވާފައިވާ، ދަރުމަވެރި އެތައް އެހީތަކެއް ވަކިވަކި ފަރުދުންނަށާއި ޖަމާޢަތްތަކަށް ފޯރުކޮށްދެއްވާފައިވާ އިޙްސާންތެރިއެއް ކަމަށެވެ. އަދި ގިނަ ބަޔަކު ދަންނަ ރަޙްމަތްތެރި ސާދާ މިޒާޖެއްގެ ވެރިއެއް ކަމަށާއި އެއީ ޚިދުމަތްތެރި ދަރީންތަކެއްގެ ބައްޕައެއްކަން ރައީސް ފާހަގަކުރެއްވިއެވެ.
ރައީސްގެ މެސެޖްގައި މަރްޙޫމް މުޙައްމަދު ޔޫސުފްގެ ޢާއިލާއަށް ތަޢުޒިޔާ ދަންނަވައި، ކެތްތެރިކަން މިންވަރުކޮށްދެއްވުން އެދި ދުޢާ ދެންނެވިއެވެ.