ގުޅީފަޅު ގިރާވަރުފަޅު އަދި ހުޅުމާލެ ފަޅުން ދޫކުރި ހުރިހާ ގޯތިތަކުގެ ރެޖިސްޓްރީ ދޫކުރުމުގެ މަސައްކަތް ބާރަށް ކުރިޔަށް އެބަދޭ: ރައީސް
ގުޅީފަޅު،ގިރާވަރުފަޅު އަދި ހުޅުމާލެ ފަޅުން، ގޯތި ލިބުނު ހުރިހާ އެންމެންގެ ގޯތިތަކުގެ ރަޖިސްޓްރީ ހެދުމާއި ރަޖިސްޓްރީ ދޫކުރުމުގެ މަސައްކަތް ވަަރަށް ބާރަށް ކުރިއަށްދާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާ މިފަދައިން ވިދާޅުވީ އާންމުންގެ ސުވާލުތަކަށް މީސްމީޑިއާގައި ސީދާ ރައީސުލްޖުމްހޫރިއްޔާ ޖަވާބުދެއްވުމުގެ ގޮތުން ރައީސުލްޖުމްހޫރިއްޔާގެ އޮފީހުން ފަށާފައިވާ ސިލްސިލާ "ރައީސްގެ ޖަވާބު" ގައި ވާހަކަފުޅު ދައްކަވަމުންނެވެ.
މި ސިލްސިލާގެ ދަށުން ރައީސް މިއަދު ޖަވާބުދެއްވީ މާލެސިޓީ ހ.މެލްބާން އިބްރާހީމް ސަމާހު މާލޭގެ ރައްޔިތުންނަށް ގޯތި ހަވާލުކުރުމުގެ ކަންކަން ކުރިއަށްދާގޮތާމެދު ކުރި ސުވާލަށެވެ.
ސަމާހުގެ ސުވާލަކީ މުހިންމު އަދި ވަރަށް ގިނަ ރައްޔިތުންނާ ގުޅިފައިވާ މައްސަލައެއްގެ ސުވާލެއްކަން ފާހަގަކުރައްވާ ރައީސް ވަނީ ގުޅީފަޅު، ގިރާވަރުފަޅުންވެސް ގޯތި ލިބުނު ހަމަ ހުރިހާ އެންމެންގެ ގޯތިތަކަށް ދޭންޖެހޭ ލިޔެކިޔުމުގެ ކަންތައްތައް ވަރަށް ބާރަށް ކުރިއަށްދާ ކަމުގެ ޔަޤީންކަން ދެއްވާފައެވެ. އެގޮތުން ގޯތި ލިބުނު ފަރާތްތަކުގެ ރެޖިސްޓްރީ ހެދުމުގެ މަސައްކަތާއި،ރެޖިސްޓްރީ ދޫކުރުމުގެ މަސައްކަތް ކުރިއަށްދާކަން ރައީސް ފާހަގަކުރެއްވިއެވެ.
"އަޅުގަނޑު ހަމަ ދޭން ބޭނުންވާ ޔަޤީން ކަމަކީ، ގުޅީފަޅުންވެސް، ގިރާވަރުންވެސް، ގޯތި ލިބުނު ހަމަ ހުރިހާ އެންމެންގެ ގޯތިތަކަށް ދޭންޖެހޭ ލިޔެކިޔުމުގެ ކަންތައްތައް ހަމަ ކުރިއަށް ދޭ ވަރަށް ބާރަށް. ރެޖިސްޓްރީ ހެދުމުގެ މަސައްކަތް، ރެޖިސްޓްރީ ދޫކުރުމުގެ މަސައްކަތް، އެބަ ކުރިޔަށް ދޭ" ރައީސް މުޢިއްޒު
ނުހިއްކާ އޮތް ސަރަޙައްދަކުން ދޫކޮށްފައިވާ ގޯތިތަކަށް ދޭން އޮންނަ ވަގުތީ ލިޔުން ޤާނޫނީ ގޮތުން ރެޖިސްޓްރީއެއް ހެދެނީ ބިން ހިއްކުނީމަކަން ފާހަގަކުރައްވަމުން ރައީސް ވިދާޅުވީ އެހެންނަމަވެސް އެ ގޯތި ލިބުނު ކަމަށް ޔަޤީންކަން ކަށަވަރުވާ ވަރުގެ ވަގުތީ ރެޖިސްޓްރީއެއް، ނުވަތަ ލިޔުމެއް ދޫކުރުމުގެ މަސައްކަތްވެސް ކުރިއަށްދާކަމަށެވެ.
އެހެން ކަމުން އެއްވެސް މީހަކު ބާކީ ނުކޮށް ގޯތި ލިބުނު ތަންތަނުން ހުރިހާ އެންމެނަށް ލިޔުމާ ރެޖިސްޓްރީ ދޫކުރުމުގެ މަސައްކަތް ބާރަށް ކުރިއަށްދާ ކަމަށް ރައީސް ވިދާޅުވިއެވެ.
"އެހެންވީމަ ގުޅީފަޅުން ވިޔަސް، ގިރާވަރުން ވެސް، އަދި ހުޅުމާލެގެ ފަޅު ތެރެއިން ހިއްކަމުންދާ ބައިން ދޫކޮށްފަހުރި ގޯތިތައް ވިޔަސް، ހުރިހާ އެންމެނަށް، ހުރިހާ އެންމެނަށް، އެއްވެސް މީހަކު ބާކީ ނުކޮށް، ހުރިހާ އެންމެނަށް ލިޔުމާ ރެޖިސްޓްރީ ދޫކުރުމުގެ މަސައްކަތް ހަމަ ބާރަށް އެބަ ކުރިޔަށް ދޭ" ރައީސް މުޢިއްޒު
ރައީސުލްޖުމްހޫރިއްޔާއަށް ރައްޔިތުންގެ ފަރާތުން ހުށަހަޅުއްވާ ސުވާލުތަކަށް ކޮންމެ ދުވަހަކުވެސް ވަގުތު ލިބިވަޑައިގަތް ވަރަކުން އެމަނިކުފާނު ޖަވާބުދެއްވަމުން ގެންދަވާނެއެވެ. ވީޑިއޯ މެދުވެރިކޮށް ރައްޔިތުން ކުރާ ސުވާލަށް ދެއްވާ ޖަވާބު، ރައީސުލްޖުމްހޫރިއްޔާގެ އޮފީހުގެ ރަސްމީ މީސްމީޑިއާ މަންސަތަކުން ކޮންމެ ދުވަހަކުވެސް ޢާންމުކޮށް ހިއްސާކުރަމުން ގެންދާނެއެވެ.