އައިޑީކާޑާއި ޕާސްޕޯޓު، ރައްޔިތުންނާ ގާތުން އަވަހަށް ފޯރުކޮށްދިނުމުގެ ޚިދުމަތް މުޅި ރާއްޖެއަށް ފުޅާކުރުމުގެ މަސައްކަތް، ރައީސް އިފްތިތާޙުކުރައްވައިފި

ދިވެހި ރައްޔިތެއްކަން އަންގައިދޭ ކާޑާއި ޕާސްޕޯޓު، ރައްޔިތުންނާ ގާތުން، އަވަހަށް ފޯރުކޮށްދިނުމުގެ ޚިދުމަތް މުޅި ރާއްޖެއަށް ފުޅާކުރުމުގެ މަސައްކަތް، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު އިފްތިތާޙުކުރައްވައިފިއެވެ. މި ޚިދުމަތް އިފްތިތާޙުކޮށްދެއްވާފައިވަނީ މިކަމަށް ޚާއްޞަކޮށް، މިއަދު ރައީސުލްޖުމްހޫރިއްޔާގެ އޮފީހުގައި ބޭއްވި ޖަލްސާއެއްގައެވެ.

މި މަސައްކަތުގެ ދަށުން މާލެ ސިޓީގެ ހުރިހާ ސަރަޙައްދެއްގެ އިތުރުން ލ. އަތޮޅާއި ދ. އަތޮޅަށް މި މަސައްކަތް ވަނީ ފުޅާކޮށްފައެވެ. އެގޮތުން، ހުޅުމާލޭ ފުރަތަމަ ފިޔަވައްސާއި، ދެވަނަ ފިޔަވައްސާއި، ވިލިމާލެ، ދ. ކުޑަހުވަދޫ އަދި ލ. ފޮނަދޫއިން ޕާސްޕޯޓުގެ ޚިދުމަތް ފޯރުކޮށްދިނުމުގެ މަސައްކަތް މިއަދު ވަނީ ފައްޓަވާފައެވެ.

ދިވެހިރައްޔިތެއްކަން އަންގައިދޭ ކާޑުގެ ޚިދުމަތް މާލެ ސިޓީގެ ހުރިހާ ސަރަޙައްދެއްގެ އިތުރުން ހދ. އަތޮޅަށް ވަނީ ފުޅާކޮށްފައެވެ. އެގޮތުން ހުޅުމާލޭ ފުރަތަމަ ފިޔަވައްސާއި، ދެވަނަ ފިޔަވައްސާއި، ވިލިމާލެ އަދި ކުޅުދުއްފުށީ ސިޓީއިން ދިވެހި ރައްޔިތެއްކަން އަންގައިދޭ ކާޑުގެ ޚިދުމަތް ފޯރުކޮށްދިނުމުގެ މަސައްކަތް މިއަދު ވަނީ ފައްޓަވާފައެވެ.

މިއަދުގެ ޖަލްސާގައި ވަނީ، ދިވެހި ރައްޔިތެއްކަން އަންގައިދޭ ކާޑާއި ޕާސްޕޯޓުގެ ޚިދުމަތް މުޅި ރާއްޖެއަށް ފުޅާކުރުމުގެ މަގުޗާޓު ވެސް ހިއްސާކުރައްވާފައެވެ. 2025 ވަނަ އަހަރުގެ ނިޔަލަށް ކޮންމެ ސިޓީއަކާއި އަތޮޅެއްގައިވެސް ކަނޑައެޅޭ ވަކި ސަރަޙައްދުތަކުގައި މި ޚިދުމަތްތައް ޤާއިމުކުރުމަށް ވަނީ ނިންމާފައެވެ.

އެގޮތުން:

• 2024 ވަނަ އަހަރުގެ ނޮވެންބަރު މަހުގެ ނިޔަލަށް ދ. ކުޑަހުވަދޫ އާއި ހދ. ކުޅުދުއްފުށީގައި

• 2025 ވަނަ އަހަރުގެ ފެބްރުއަރީ މަހުގެ ނިޔަލަށް ހދ. މަކުނުދޫގައި

• 2025 މާރިޗުމަހުގެ ނިޔަލަށް ގދ. ތިނަދޫ އަދި ގދ. ގައްދޫގައި

• 2025 ވަނަ އަހަރުގެ އެޕްރިލް މަހުގެ ނިޔަލަށް އައްޑޫ ސިޓީގެ ހިތަދޫ އާއި ހުޅުމީދޫގައްޔާއި ފުވައްމުލައް ސިޓީގައި

• 2025 ވަނަ އަހަރުގެ މޭމަހުގެ ނިޔަލަށް ހއ. ދިއްދޫ، ހއ. އިހަވަންދޫ، ރ. އުނގޫފާރު އަދި ރ. އަލިފުށީގައި

• 2025 ވަނަ އަހަރުގެ ޖޫންމަހުގެ ނިޔަލަށް، ށ. މިލަންދޫ އާއި ށ. ފުނަދޫ އާއި ލ. ފޮނަދޫގައި

• 2025 ވަނަ އަހަރުގެ ޖުލައި މަހުގެ ނިޔަލަށް ނ. ވެލިދޫ އާއި ތ. ވޭމަންޑޫގައި

• 2025 ވަނަ އަހަރުގެ އޯގަސްޓު މަހުގެ ނިޔަލަށް އދ. މަހިބަދޫ އާއި ބ. ދަރަވަންދޫގައި

• 2025 ވަނަ އަހަރުގެ ސެޕްޓެމްބަރު މަހުގެ ނިޔަލަށް ޅ. ނައިފަރު އަދި ފ. ނިލަންދޫގައި

• 2025 ވަނަ އަހަރުގެ އޮކްޓޯބަރ މަހުގެ ނިޔަލަށް، މ. މުލި އަދި އއ. ރަސްދޫގައި

• 2025 ވަނަ އަހަރުގެ ނޮވެމްބަރު މަހުގެ ނިޔަލަށް ވ. ފެލިދޫ، ކ. ތުލުސްދޫ އަދި ކ. ގުރައިދޫގައި

ރައްޔިތުންނަށް ބޭނުންވާ އަސާސީ ޚިދުމަތްތައް ރައްޔިތުން ތިބި ހިސާބަކުން ފޯރުކޮށްދެއްވުމަކީ، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުގެ ރިޔާސީ ވަޢުދެކެވެ.